Pranimi prej Serbisë, i pavarësisë së Kosovës, paraqet synim kryesor gjeostrategjik në Ballkan, si për qeverinë e SHBA-së, ashtu edhe të BE-së, por këto fuqi perëndimore janë thellësisht të ndara rreth asaj se si të arrihet një gjë e tillë, shkruan në një analizë të “Foreign Policy”, teksa komentohen zhvillimet e lidhura me publikimin e aktakuzës ndaj Thaçit, teksa ai ishte rrugës për në Washington.

“Qëndrimi mbizotërues në Bruksel është se një gjë e tillë duhet të bëhet duke e nxitur Serbinë ta pranojë status-quonë dhe vullnetshëm të heqë dorë prej pretendimeve të veta mbi Kosovën – qasje kjo të cilën qeveria në Beograd vazhdimisht e ka hedhur poshtë”, shkruan revista prestigjioze amerikane.

Administrata e presidentit të SHBA-së, Donald Trump, në anën tjetër, është shumë më fleksibile, teksa ka thënë në të kaluarën se do të njohë “secilën zgjidhje të pranueshme prej të dyja palëve”, gjë që supozohet se do të përfshinte korrigjim kufijsh. Një marrëveshje e tillë do të binte ndesh me interesat e Brukselit, e rrjedhimisht edhe koha kur është bërë publike aktakuza ndaj Thaçit është parë me dyshim prej shumicës.

BE-ja e ka refuzuar vazhdimisht shkëmbimin e territoreve, teksa edhe vetë i dërguari i posaçëm i BE-së për dialogun, Miroslav Lajçak, e kishte theksuar se shkëmbimi i territoreve “nuk është në agjendë dhe nuk duhet të jetë në agjendë”.

Administrata Trump, nga ana tjetër, duket e gatshme ta çojë përpara secilën zgjidhje që do të mund ta proklamonte si fitore të politikës së jashtme, në prag të zgjedhjeve presidenciale të nëntorit.

Takimi i Grenellit me Vuçiqin dhe Thaçin mund të jetë anuluar për tani, por fakti se një takim i tillë ishte caktuar, duhet të shërbejë si thirrje për zgjim për Brukselin. Gjatë dekadës së kaluar, BE-ja ka qenë aq shumë e preokupuar me krizat e veta të numërta, saqë s’ka pasur shumë hapësirë për t’u marrë me Ballkanin. Kjo sprapsje ka bërë që ndikimi i Evropës në rajon të zbehet, shkruan “Foreign Policy”.